Веста која речиси никој од Западниот свет не ја објави е дека на 24 април Сирија доби донација од 150 илјади кинески вакцини.
На меѓународниот аеродром во Дамаск кинеската пратка била пречекана од страна на сирискиот министер за здравство Хасан ал-Хабаш, заменик-министерот за надворешни работи Башар ал-Џаафари, како и кинескиот амбасадор во земјата, Фен Бјао.
Се работи за вакцини на Sinopharm, какви што денеска пристигнаа и кај нас.
Кина организираше и видео-конференција на која кинески доктори го споделија своето искуство со сириските колеги за лекувањето на заболените од вирусот.
„150 илјади дози анти-ковид донирани гратис од Кина за сирискиот народ пристигнаа на аеродромот во Дамаск. Во меѓувреме, 'цивилизираните' земји од ЕУ и САД продолжуваат со ембарго и санкции врз Сиријците кои се растргнати од војна, тероризам, сиромаштија и зголемени трошоци за живот! Хипокрити ниедни!“, напиша на Facebook сирискиот новинар Наман Тарча.
Во Сирија до денес се регистрирани 22.513 случаи на коронавирусот, додека 1.572 починаа како последица од истиот. Но, во земјата каде Владата нема контрола врз целата територија, овие бројки треба да се земат со резерва бидејќи е многу веројатно тие да се далеку поголеми.
