Научниците претпоставуваат дека древните мумии на деца пронајдени во Перу претставуваат жртви кои биле принесени како придружба на задгробниот живот.
„Веруваме дека шест мумифицирани деца биле жртвувани за да го придружуваат починатиот благородник во задгробниот живот“, објавија археолозите.
Ситни скелети, цврсто завиткани во ткаенина, беа пронајдени во гробницата на висока личност во древното општество, веројатно политичка личност, која беше откриена во ноември минатата година на локацијата Кајамаркила, на околу 24 километри од Лима.
Децата можеби биле блиски роднини
„Децата можеби биле блиски роднини. Тие биле позиционирани во различни делови од влезот на гробницата, едно врз друго. Нашата хипотеза е дека децата биле жртвувани за да ја придружуваат мумијата на благородникот во подземниот свет“, изјави археологот Пјетер ван Дален.
Кајамаркила е древен град од кал изграден околу 200 п.н.е., во периодот пред Инките. Бил населен до околу 1500 година. Во него можеле да живеат од 10.000 до 20.000 луѓе.
Ван Дален рече дека мумиите на децата се стари помеѓу 1.000 и 1.200 години. Во близина на гробницата археолозите пронашле и коски на седум немумифицирани возрасни лица, останки од животни слични на лама, како и глинени садови.
Посмртните останки на благородникот беа пронајдени минатата година во гробница долга околу три метри и длабока 1,4 метри. Благородникот имал околу 20 години кога починал. Тој бил погребан со рацете на лицето и со телото врзано со јаже.