Крилниот напаѓач на тимот од Леверкузен ги предупреди Италијaнците во пресрет на вечерашната пресметка од четврфиналето во второто по ранг европско клупско натпреварување.
„Оптимисти сме, сконцентрирани и очекуваме да победиме. Ова е директен елиминациски натпревар за кој свесни сме дека сѐ е можно“, почнува Кевин Фоланд во интервју за веб-страницата Fcinter1908.
„Очекуваме прилично затворена игра. Ќе биде интересно, и двата тима имаат голем квалитет. Можам да ги замислам навивачите низ целиот свет како на ТВ гледаат убав натпревар“.
Пресметката почнува вечер од 21 часот, а ќе се игра пред празни трибини на неутрален терен на „Меркур Шпил-Арена“ стадионот во Дизелдорф.
„Да се има страв за ваков натпревар би било фатално и тоа е важно и за двата тима. Убеден сум дека и ние и Интер не се плашиме од другиот. Она што е корисно е почитта, ништо друго, се разбира, покрај вербата во сопствениот квалитет. Ние сме убедени дека можеме да го победиме Интер“, тврди 28-годишниот Германец.
Фоланд од 2018 е во Баер, а претходно играше за 1860 Минхен и за Хофенхајм. Досега во кариерата нема освоено титули, па сезонава во Лига Европа му е шанса да се стекне со првиот трофеј.
„Интер е еден од најсилните европски тимови со многу силни страни. Реков 'тим' затоа што ниту еден играч не може да игра сам. Имаат многу фудбалери со неверојатни способности, но важен е тимот. Мора да ги почитуваме „Нераѕурите“ и да не го ситниме нивниот тим на индивидуалци“.
Натпреварот ќе го суди Французинот Клемен Турпен. Победникот во полуфиналето ќе игра со подобриот од дуелот помеѓу Шахтар и Базел.