Со највисоки државни и воени почести, премиерот на Северна Македонија, Димитар Ковачевски, ја пречека претседателката на Европската комисија, Урсула фон дер Лајен, која во неделата допатува во Скопје, од каде ја започна посетата на земјите од Западен Балкан.
Во рамките на турнејата, предвидено е подетално пред регионалните лидери да се презентира Планот на ЕУ за пристапување на Западен Балкан.
„Секогаш е задоволство да се биде овде во Скопје и да се посети оваа прекрасна земја. Денес сум тука главно за да ви кажам вам и на граѓаните на Северна Македонија дека сте на вистинскиот пат да се приклучите на Европската Унија. Многу се радувам што ќе ве дочекам. Вие, премиере, го опишавте напредокот и чекорите напред во последните неколку години. Морам да кажам дека е неверојатно да се види напредокот што го постигна Северна Македонија“, истакна Фон дер Лајен.
Северна Македонија е кандидат за членство во Европската Унија од 2005 година и го чека почетокот на преговорите подолго од која било друга земја, но Собранието на Северна Македонија сè уште нема мнозинство гласови за уставни измени. Процесот на уставни измени, со кои треба да се вклучат Бугарите во македонскиот Устав, започна во август во македонското Собрание, но истиот ден беше прекинат. За да се усвојат амандманите, треба да гласаат две третини од 120-те пратеници во парламентот.
