Pagani, во соработка со компанијата Racing Unleashed, го дизајнираше врвниот гејминг симулатор Huayra R.
Како што сугерира неговото име, симулаторот е инспириран од моделот Huayra R и е дизајниран да понуди „автентично Pagani искуство“. Платформата долга 3.110 мм е направена од јаглерод кој потекнува од истите автоклави како и јаглеродот наменет за производството на хиперавтомобили.
Основата ги содржи отворите за вентилација типични за автомобилите на Pagani, а нивната цел е да помогнат во ладењето на гејмерските компјутери со високи перформанси, кои работат на Assetto Corsa Pro.
Освен атрактивната надворешност, симулаторот ја има истата поставеност како Huayra R. Тоа значи дека има седиште, волан и педали кои се користат за вистински хиперавтомобил, а овие компоненти се прикачени на голем панорамски екран, како и компоненти од брусен алуминиум.
Од Pagani велат дека инженерските и дизајнерските тимови внимателно се грижеле за секој детаљ за симулаторот да биде верно рекреиран. Вклучува „управување, динамика и аеродинамички ефекти на вистински автомобил благодарение на трите степени на слобода кои му даваат на возачот чувство на движење, вртење и свиоци. Сите функции се темелно тестирани од професионални и развојни возачи“.
Звукот е исто така исклучително важен, па симулаторот доаѓа со VR слушалки, аудио систем 5.1 и звучници интегрирани во седиштето. Технологијата овозможува „експресивен звук на моторот Pagani V12-R“, како и чувство на вибрации на патот.
Според производителот, симулаторот е „верен и извонреден“, бидејќи „комбинираниот дизајн на хардвер и софтвер овозможува исклучителен реализам во репродукцијата на движењата на автомобилот и карактеристиките на асфалтот“. Корисниците можат да возат поединечно, но и да резервираат онлајн инструкции за да запознаат нови патеки и да научат нови вештини. Компанијата ќе организира и серија виртуелни настани, а сопствениците ќе можат да организираат предизвици и трки меѓу себе.
Иако изгледа како играчка со висока технологија за ултра богатите, Pagani истакна дека симулаторот е дизајниран да им помогне на сопствениците да се запознаат повеќе со своите автомобили, да ги подобрат своите возачки вештини и да научат повеќе за различни патеки. Ова е важно бидејќи програмата „Arte in Pista“ им овозможува на клиентите „целосно да ги искусат своите возила“ и нивните перформанси преку богат календар на ексклузивни и неконкурентни настани, одржани на најпрестижните патеки на ФИА во светот. Сопствениците можат да ги запознаат патеките и да дознаат како нивните автомобили ќе се однесуваат на тие патеки во реалноста.
Симулаторот првично ќе биде исклучиво достапен за сопствениците на моделот Huayra R, а подоцна ќе ѝ биде понуден и на пошироката јавност.
