Новак Ѓоковиќ и Рафаел Надал го отворија Ролан Гарос со рутински победи, додека нивниот најголем ривал Даниил Медведев денеска го започнува походот кон титулата.
Ѓоковиќ во првото коло играше против Јошихито Нишиока и славеше со 3:0 во сетови по точно 2 часа игра.
Јапонецот одолеа само во првиот сет, кој Ѓоковиќ го реши во своја корист со 6:3, а потоа најдобриот тенисер на светот во следните два сета се прошета добивајчи ги со 6:1 и 6:0 и се пласираше во второто коло, каде ќе игра против подобриот од дуелот меѓу Алекс Молчан и Федерико Кориа.
И на Надал за првата победа му требаа два часа против Џејсон Томпсон. Шпанскиот тенисер ги доби сите три сета со идентични 6:2 и се избори за пласман во второто коло против Корентан Муте, кој го победи Стен Вавринка со 3:1.
Денеска во 11 часот на терен ќе излезе Даниил Медведев. Вториот тенисер во светот ќе игра против Факундо Бањис (АТП 103), а потенцијални противници во второто коло му се Ласло Ѓер или Рикардас Беранкис.
Со освојување на Ролан Гарос и евентуално предвремено испаѓање на Ѓоковиќ од турнирот, Медведев би ја преземал водечката позиција во светскиот тенис.
Интересно, и Александер Зверев би можел да стигне до првото место на АТП листата доколку го освои турнирот, а Ѓоковиќ и Медведев бидат елиминирани во раната фаза од натпреварувањето.
