Словачкиот тениски тренер Марјан Вајда повеќе не е дел од тренерскиот тим на Новак Ѓоковиќ. Вајда го тренираше српскиот тенисер цели 15 години, нивната соработка почна во 2006 година.
„Новак и Марјан се сложија да ја завршат соработката уште минатата година, по турнирот во Торино. Марјан, како тренер, ја имаше една од клучните улоги во тимот на Новак и придонесе Ѓоковиќ да освои 20 Грен слем титули, како и да оствари рекорд од дури 361 недела мината на првото место на АТП листата“, стои во објавата на интернет страницата на Новак Ѓоковиќ.
Споменат е и Горан Иванишевиќ, поранешен хрватски тенисер, кој сега остана единствениот тренер на Ѓоковиќ.
„Од 2019 година во стручниот тим се придружи и Горан Иванишевиќ, кој исто така има многу важна улога во тимот и ќе продолжи да работи со Новак“.
Ѓоковиќ му се заблагодари на Вајда за досегашната соработка.
„Марјан беше покрај мене во текот на најважните и незаборавни моменти во мојата кариера. Заедно имаме постигнато неверојатни работи и многу сум благодарен на неговото пријателство и посветеност во текот на изминатите 15 години. Иако го напушта мојот тренерски тим, секогаш ќе биде дел од моето семејство и не можам доволно да му заблагодарам за тоа што го направи за мене“, смета тенисерот.
Претходно, еден од најголемите спонзори на Ѓоковиќ, Peugeot, одлучи да ја раскине долгогодишната соработка што ја имаше со српскиот тенисер.