Истражувачите на космосот преку одличниот телескоп Hubble на НАСА пронајдоа не една, туку две астроигли во две различни галактички сена. Станува збор за спојувачки парови на квазари кои би можеле да откријат како се формираат галаксиите.
Со искористување на огромното богатство на информации собрани од сателитот Gaia на ЕСА и земјиниот Sloan Digital Sky Survey, истражувачите го стеснија кругот на нивната потрага по овие ретки, но екстемно сјајни двојни квазари, кои се кријат помеѓу ѕвездите низ вселената.
Квазар е екстремно сјајно јадро од галаксија, кое се храни со ненаситниот апетит од блиска супермасивна црна дупка чие бескрајно хранење испушта сноп од радијација толку сјајна, што може да засени цели галаксии како што е нашиот Млечен Пат.
„Претпоставуваме дека во далечната вселена за секои 1.000 квазари постои еден двоен квазар. Така да, да се најдат овие двојни квазари е како да најдете игла во пласт сено“, вели главниот истражувач Јуе Шен од Универзитетот во Илиноис.
Гледајќи 10 милијарди години во минатото, низ вселената, истражувачите пронајдоа пар од квазари толку блиску еден до друг што излезе дека претставуваат еден навистина насилен објект. Потоа, сосема случајно, открија уште еден пар во друг пар галаксии кои се во судир една со друга.
Ова отритие ќе го зацврсти разбирањето за точниот процес кој се крие зад овие насилни судири на ваквите масивни вселенски структури, давајќи нови погледи врз спојувањето на галаксиите и колизијата на супермасивните црни дупки.
Кога квазарите, или галактичките јадра, се судираат, генерираат галактички ветрови кои го растураат преостанатиот гас од галаксиите кои се судираат, успорувајќи или целосно стопирајќи го формирањето на нови ѕвезди, но овозможувајќи да се формираат нови единечни галаксии со елипсовидна форма.
Досега само нешто над 100 вакви квазари се пронајдени, но ниту еден со старост како овие два пара. Квазарите во секој од овие нови два пара се оддалечени само 10 илјади светлосни години. Како за споредба, Сонцето е 26 илјади светлосни години оддалечено од супермасивната црна дупка која се наоѓа во центарот на Млечниот Пат.
