Националната и универзитетска библиотека „Св. Кирил и Методиј“ е вистински извор на пишани богатства. Таму можете да најдете сѐ и сешто, од стари книги и сите весници што излегувале во Македонија уште одамна пред независноста. Бадијала кога има некои што не знаат да го ценат тоа.
Со зачленување во библиотеката добивате пристап до целиот фонд. Некои работи смеете да ги зајмувате и да ги читате дома, но оние поретките примероци се разгледуваат на лице место. Таков е примерот со весникот Нова Македонија, чии примероци во библиотеката се зачувани уште од најпрвиот број.
Некој крајно неодговорен читател решил да си исече сѐ што му требало од едно издание на Нова Македонија од 90-тите и да си го однесе дома, оставајќи ги неколкуте примероци засекогаш оштетени.
Наидовме на оштетени примероци од месец октомври 1995 година, во спортскиот дел. Иако библиотеката нуди копирање на она што ви треба, овој идиот одлучил (веројатно) со скалпел да си исече она што му треба и да го украде.
Примерокот од октомври 1995 останува засекогаш оштетен за сите наредни генерации што имаат потреба да го користат, на статиите што се наоѓаат на исечените станици повеќе не можат да се прочитаат.
Цела среќа што во архивата на библиотеката се наоѓаат дупликат примероци од сите весници, па овие броеви постојат и во неоштетени примероци, но тие не им се достапни на граѓаните. И со право, зашто што никој не гарантира колку идиоти има...
А ова несомнено е и уште една причина зошто и тоа како е потребна дигитализација. Македонската бибиотека е една од ретките во Европа што своите весници ги нема достапни во дигитална форма. На тој начин оригиналните примероци би се зачувале не само од вакви идиоти, туку и од распаѓање поради честа употреба, а воедно би биле многу полесно достапни за сите што имаат потреба од нив, дури и со неколку кликови од дома за одредена претплата.