Научниците претходно утврдија дека микропластиката се наоѓа на најоддалечените места на копното и во океанот, во нашата храна, но и во воздухот што го дишеме.
Во најновото истражување, експертите се обидоа да утврдат точно како честичките микропластика се однесуваат во воздухот и дали тие влијаат на нашиот климатски систем. Имено, други видови честички, како што е прашината, или ја расејуваат, или апсорбираат сончевата светлина и следствено или ја ладат, или ја загреваат нашата атмосфера. Сега научниците открија дека микропластиката ги прави и двете.
Во поголема мера ја лади атмосферата
Експертите првично очекуваа дека микропластиката во воздухот, како и повеќето аеросоли, ќе ја распрсне сончевата светлина и ќе ја рефлектира назад во вселената; што би значело ладење на климата на Земјата, пишува The Conversation.
Повеќето видови на аеросоли во атмосферата расфрлаат светлина, па може да се каже дека аеросолите делумно го компензираат затоплувањето предизвикано од стакленичките гасови. Единствен исклучок е чадот, кој добро ја апсорбира сончевата светлина и има ефект на затоплување.
Студијата покажува дека микропластиката во воздухот е ефикасна за распрскување на сончевата светлина, што подразбира ефект на ладење врз климата. Сепак, може да го апсорбира и зрачењето кое го испушта Земјата, што значи дека многу малку придонесува за ефектот на стаклена градина.
Иако влијанието на микропластиката врз глобалната клима во моментов е многу мало, доминирана од ефектот на ладење, научниците веруваат дека во иднина ќе се зголеми до степен до кој микропластиката во воздухот би можела да има влијание врз климата споредливо со другите видови аеросоли.
Влијанието на климата во иднина
Се проценува дека до денес, околу 5 милијарди тони пластичен отпад се акумулирани на депониите или во животната средина. Таа бројка исто така се предвидува да се удвои во следните три децении. Без сериозен напор за решавање на проблемот со микропластично загадување, експертите веруваат дека тоа може да има позначајно влијание врз нашата клима во иднина.
Студијата Direct radiative effects of airborne microplastics е објавена во списанието Nature.
