По објавувањето на истражувачкиот документарен филм „Нечиста крв“ на Истражувачката репротерска лабораторија – ИРЛ Македонија, редакцијата на овој медиум соопшти дека граѓаните кои имале ист или сличен проблем како семејството Брезеви, започнувајќи од утре ќе добијат бесплатна правна помош од Здружението на млади правници и Хелсиншкиот комитет.
„ИРЛ, Здружението на млади правници, Хелсиншки комитет за човекови права денеска се договорија за бесплатна правна помош за граѓани кои имале проблем со здравствениот систем во земјава. Оваa соработка за помош доаѓа откако беше објавено новинарското истражување на Истражувачката репортерска лабораторија (ИРЛ) ‘Нечиста крв’. По емитувањето на епизодата, до редакцијата на ИРЛ пристигнаа стотина пријави од граѓани со исто и слично искуство како семејството Брезеви од Велес. Пријавите се однесуваат на повеќе приватни и државни болници во земјава“, стои во објавата на ИРЛ Македонија.
Истражувачката репортерска лабораторија е составена од мал тим и оперира со ограничени ресурси, а со понудената правна помош од Здружението на млади правници и од Хелсиншкиот комитет сите пријави на граѓани ќе може да се обработат во побрз временски период.
Хелсиншкиот комитет и Здружението на млади правници ќе започнат да ги обработуваат и примаат пријавите од граѓани од утре (20.07.2022). Во текот на утрешниот ден ќе бидат соопштени сите детали и контакт телефони каде што граѓаните ќе може да се обратат, велат од ИРЛ.
Граѓаните ќе добијат иницијална правна помош, застапување односно помош за поднесување на кривични пријави, како и мониторинг на судски случаи.
Истражувачкиот документарен филм „Нечиста крв“ е во копродукција на ИРЛ и МРТ1 и се емитуваше во недела, 17 јули 2022 година на првиот јавен програмски сервис и на YouTube каналот на ИРЛ.