ФБИ ја додаде Ружа Игнатова, позната и како „криптокралица“, на листата 10 најбарани бегалци поради измама на инвеститори за над 4 милијарди долари.
Овој потег следи откако Европол претходно годинава ја додаде Игнатова на листата најбарани криминалци.
„Тоа е важен алат за нас, листата на првите 10“, истакна помошник директорот на ФБИ Мајкл Дрискол пред новинарите. „Мислиме дека јавноста е во најдобра позиција да помогне“, додаде тој.
Бугарската адвокатка Ружа Игнатова тврдеше дека измислила криптовалута конкурентна на биткоинот. Таа и други лица наводно давале лажни изјави додека барале инвеститори и го промовирале OneCoin низ маркетинг стратегија на повеќе нивоа, соопшти ФБИ.
Игнатова ги убедила инвеститорите да вложат милијарди долари, капитализирајќи ја работата околу криптовалутата, пред да исчезне во 2017 година откако е издаде налог за нејзино апсење.
„Има многу пари и прилично брзо тргна на пат“, изјави Дрискол.
Се верува дека добила дојава дека е под истрага, па избегала. На 25 октомври 2017 година отпатувала од Бугарија во Грција и оттогаш не е видена, наведе ФБИ.
Обвинета е за здружување поради интернет измама, измама, завера за дејство на перење пари, завера поради измама со вредносни хартии и измама со вредносни хартии.
Игнатова е единствената жена на листата на ФБИ во десетте најбарани бегалци и единаесетта во 72-годишната историја. Се нуди награда до 100.000 долари за информации кои би довеле до нејзино апсење.
Познато е дека патува низ источна Европа и Блиски Исток, а веројатно има направено пластична операција за да го промени изгледот.
