Поранешниот италијански репрезентативец Даниел Освалдо (38) ја шокираше јавноста со синоќешната објава на Instagram каде призна дека веројатно минува низ најтешкиот период во животот.
Имено, Освалдо низ солзи зборуваше за своето ментално здравје и за зависностите што му се појавиле.
„Тешко ми е, но мислам дека е време затоа што сум прилично очаен. Воопшто не ми оди добро, чувствувам потреба да кажам дека веќе некое време се борам со депресија што ме доведе до некои зависности - алкохол и дрога. Чувствувам дека животот излегува од контрола. Јас сум на психијатриско лекување, пијам лекови. Имам специфична болест, губење на самодовербата, депресија и многу пати се враќам на зависностите. Паѓам во самоуништување и практично живеам затворен дома. Не одам никаде, не ми ме интересира да станам од кревет, излегувам од соба, да јадам... паднав во многу тешки зависности кои само ја влошија мојата депресија“, раскажа Освалдо.
Во продолжението на признанието рече дека ова не го кажува затоа што глуми жртва, туку за сите да ја разберат причината за неговите погрешни одлуки.
„Се лекувам на психијатрија, но тешко ми оди. Повторно запаѓам во зависност и се дистанцирам од луѓето што ги сакам. Во минатото бев врвен фудбалер, бев сосема друга личност, горд и самоуверен. Ова е личност која не ја препознавам. Многу е тешко да се каже што е реално, а што не. Не можам сам да излезам од тоа. Сакам да излезам од тоа, сакам да се вратам во битието што бев порано. Сега не знам како да излезам од оваа куќа, немам стабилна работа, ги потрошив сите пари. Секогаш бев добар пријател, добар другар, се надевав дека ќе бидат добар татко“, рече тој.
Инаку, Освалдо во текот на кариерата настапуваше за Уракан, Аталанта, Лече, Фиорентина, Болоња, Еспањол, Рома, Саутемптон, Јувентус, Интер, Бока Жуниорс, Порто и Банфилд.
Роден Аргентинец, ги бранеше боите на Италија поради италијанското потекло, но одигра само 14 натпревари на кои постигна 4 гола. Никогаш не заигра на ЕУРО или Мундијал.