Многу луѓе, без да бидат свесни за тоа, често посегнуваат по храна кога не се гладни, туку всушност се само жедни.
Чувствуваат дека нешто им недостига во телото, но ни самите не знаат што точно. Научниците потврдуваат дека сигналите за глад и за жед потекнуваат од истото подрачје во мозокот, па не е ни чудно што понекогаш ги мешаме.
„Ако се чувствувате ирационално, фрустрирано и брзо се нервирате, постои голема веројатност да сте гладни или во најмала рака, брзо согорувате шеќери. Многу луѓе со кои работам се гладни и раздразливи кога неколку часа немаат јадено. Покрај тоа, често ми опишуваат и други нуспојави како умор, незаситен копнеж и вртоглавици“, објаснува доктор Вил Кол.
Советува во исхраната да воведеме здрави маснотии за да му дадеме на телото поголеми количини гориво потребно за нормално функционирање. Токму тој недостиг на енергија е уште еден од знаците на глад.
Кога станува збор за препознавање на знаците на жед, еден од најчестите е главоболката, но неретко се појавува и кај чувството на глад. Ако знаете дека доволно сте јаделе, а ве боли главата, можно е на телото да му недостигаат течности или обратно.
„Всушност, многу е вообичаено да имате главоболка кога на вашето тело му треба вода. Кога сме дехидрирани, тогаш е помал и волуменот внатре во крвните жили, а протокот на крв е отежнат. Тоа предизвикува чувство на вртоглавица и главоболка“, објаснува неврологот Илен Рухој.
Кога се работи за главоболка предизвикана од глад, ниското ниво на шеќер во крвта може да значи дека мозокот не ја добива потребната енергија од храната. Овој вид главоболка има и други нуспојави како мачнина или вртоглавици. Важно е да знаете дека ако сте изеле оброк богат со јаглехидрати може да доживеете скок на шеќерот во крвта, а тоа знае да предизвика главоболка, објаснува таа.
