На Јувентус неодамна привремено му ги вратија одземените 15 бодови поради казната за финансиските малверзации, но во торинскиот клуб се свесни дека сепак нема да поминат неказнето.
Судот при Фудбалската федерација на Италија (ФИГЦ) во првичната пресуда од февруари го казни Јувентус со одземање на 15 бодови.
Во меѓувреме, тие бодови му беа вратени откако беше прифатена жалбата и постапката се врати на повторно одлучување.
Сепак, се очекува Јувентус да не мине неказнето, а постојат нијанси кои се многу важни за раководството на најтрофејниот калчолигаш.
Во Јуве се надеваат дека ќе бидат казнети со одземање на 9 бодови, што е практично казната која првично се споменуваше како најреална и која во првичната постапка ја побара обвинителот од ФИГЦ.
Меѓутоа, таа казна за клубот не е добра бидејќи на тој начин нема да ја исполни натпреварувачката цел - пласман во европските купови. Со 9 одземени бодови тимот во моментов би паднал на 8. место и со 57 бодови би заостанувал 4 бода зад местото што води во Лига Европа и 6 зад она во Лигата на шампионите.
Поради тоа торинскиот клуб ќе се обиде да издејствува што помала казна, но и ќе направи сѐ за таа казна да важи за наредната сезона 2023/2024, а не за тековната. Доколку овие желби на „Старата дама“ се исполнат, тогаш тимот наредната сезона веројатно би играл во Европа, освен доколку не интервенира и УЕФА која бара Јуве да плати за гревовите со неиграње во европските купови.