Засега е концепт, но голема е веројатноста наскоро да се појави во продажба.
Концептот на футуристички дом на тркала носи совршена комбинација на дизајнот на Porsche и искуството со најпознатиот производител на кампери, легендарниот Airstream.
Станува збор за концепт на камп-приколка наменет за помали теренци ако ги гледаме американските, а сосема пристојни ако ги гледаме европските вкусови. Практично гледано, тоа е дом на тркала кој со својот стил го надополнува сето она што значи премиум SUV од калибарот Porsche Cayenne или претстојниот електричен Macan.
Има пет метри во должина и нуди прилагодлив внатрешен дизајн кој предвидува повеќе функции. Задниот крај може да биде целосно отворен, што буквално ја поврзува дневната соба со околината. Навечер, кога е затворен, истиот простор станува спална соба. Камперот е комплетно опремен, кој вклучува чајна кујна со сите апарати, бања и простор за складирање.
Покрај рендерите, создаден е и модел на камперската приколка во размер 1:3, кој ќе биде изложен на саеми низ Америка.
За можноста за масовно производство, извршниот директор на Airstream рече: „Иако нашите концептни дизајни не секогаш се појавуваат на пазарот, лекциите и иновациите што доаѓаат од нив честопати влијаат на сегашните и идните дизајни додека тие се пробиваат во нашите мејнстрим производни линии.“
Со други зборови, доколку овој концепт не заживее во сериското производство, сигурно е дека бројни решенија, па дури и дизајнерскиот израз, на некој начин ќе се вградат во идните производи.
На пример, ова е првиот производ на Airstream дизајниран да се вклопи во стандардна гаража. За време на транспортот, вкупната висина е 2,1 метри, што го прави компатибилен со повеќето гаражни врати. Кога се користи, покривот е подигнат, што ослободува дополнителен простор.
Што се однесува до цената, добар репер е Airstream Bambi со слични димензии, чија цена во Америка започнува од 59.300 долари.
