Канадскиот милионер од модната индустрија Питер Нигард е уапсен во канадскиот град Винипег на основа на Законот за екстрадиција бидејќи во САД е обвинет за силување на повеќе жени и девојчиња.
На почетокот на годинава американските сојузни власти извршија претрес во седиштето на неговата компанија во Менхетн, откако 10 жени поднесоа тужба дека Нигард ги намамил на имот на Бахами, ветувајќи им помош да изградат кариера како манекенки, а потоа ги нападнал, силувал и содомизирал, пренесе Reuters.
Неколку од нив тврдат дека тогаш имале 14 или 15 години кога Нигард им дал алкохол или дрога, а потоа ги силувал. Педесет и седум жени се приклучија на тужбата според која 79-годишниот Нигард со години употребувал насилство, застрашување и мито кон нив.
Нигард ги негира сите наводи и за оваа завера тврди дека е предизвикана поради конфликт со сосед милијардер на Бахами.
Портпаролот на неговата компанија соопшти претходно дека Нигард си заминува од местото на претседател на компаниите што ги поседува и дека ќе се откаже од сопственичкиот удел. Неговиот малопродажен сектор има над 170 продавници во Северна Америка.