Не погоди во Суперкупот на Германија, но тоа му успеа во првото коло од Бундеслигата. Баерн славеше на гости во Бремен против Вердер со 4:0, а најголемото засилување за оваа сезона, Хари Кејн, постигна гол и асистираше.
Квалитетот не беше доведен во прашање, сите знаат за каков играч се работи, но само се чекаше неодамнешниот напаѓач на Тотенхем за првпат да ја затресе мрежата во дресот на баварскиот клуб. Прво беше во улога на асистент во 4. минута, кога Лирој Сане одлично се снајде и погоди за водство на гостите.
На вториот гол требаше да чекаме до 74. минута, кога и се случи првиот гол на Кејн. Канаѓанецот Алфонсо Дејвис го проигра англискиот центарфор, кој беше доволно фокусиран и прецизен за 2:0.
Десет минути подоцна Кејн се пожали на грч во потколеницата, а Томас Тухел почувствува дека нема потреба да ризикува, па наместо Хари на теренот влезе Камерунецот Ерик Шупо-Мотинг.
Лирој Сане погоди за 3:0 во последната минута пред судиското надополнување, по проигрувањето од Томас Милер, додека французинот Матис Тел го постави конечниот резултат во 90+4.
Бундеслига, 1. коло:
синоќа:
Вердер - Баерн 0:4
4', 90' Лирој Сане, 74' Кејн, 90'+4 Тел
сабота:
Баер Леверкузен - Лајпциг (15:30 ч.)
Волфсбург - Хајденхајм (15:30 ч.)
Хофенхајм - Фрајбург (15:30 ч.)
Штутгарт - Бохум (15:30 ч.)
Аугсбург - Борусија Менхенгладбах (15:30 ч.)
Борусија Дортмунд - Келн (18:30 ч.)
недела:
Унион Берлин - Мајнц (15:30 ч.)
Ајнтрахт - Дармштад (17:30 ч.)