Истражувачи од Факултетот за јавно здравје Johns Hopkins Bloomberg развија калкулатор за проценка на ризикот од смрт кај луѓето со COVID-19. Тие се надеваат дека калкулаторот може да биде корисен и за проценка на приоритетите за вакцинација против коронавирус.
Алгоритмот во основата на калкулаторот користи податоци од постоечки големи студии за да се процени ризикот од смртност од COVID-19 врз основа на возраста, полот, социодемографските фактори и низа различни здравствени состојби.
„Нашиот калкулатор претставува квантитативен пристап и треба да ги надополни другите квалитативни насоки, како што се оние на Националната академија за наука и медицина, за утврдување на ризикот и распределбата на вакцини“, рече д-р Ниланџан Чатерџи, еден од авторите на истражувањето.
Новиот калкулатор за проценка на ризик беше презентиран во труд објавен во списанието Nature Medicine. Податоците собрани од истражувачите може да им помогнат на државите да ја планираат вакцинацијата на населението.
Се покажа дека постарите лица и оние со постојни здравствени состојби се изложени на поголем ризик, а децата и младите најчесто имаат полесна форма на болеста. Покрај тоа, постојат јасни етнички и расни разлики - во САД е забележана поголема смртност од COVID-19 кај Латиноамериканците и Афроамериканците отколку кај белците, пишува News Medical.
Чатерџи и неговиот тим го развија својот модел на ризик користејќи неколку збирки на податоци поврзани со КОВИД, вклучувајќи една голема британска студија и стапките на смртност на ниво на држава, објавени од Центрите за контрола и превенција на болести на САД (CDC). Врз основа на овој модел, тие создадоа калкулатор кој му овозможува на корисникот да утврди индивидуален ризик врз основа на фактори како што се возраста, полот, расата/етничката припадност и историјата на болести.
Алатката може да се користи и за дефинирање на ризик за одредена група, на пример за одредена заедница, корпорација или универзитет, заснована врз комбинација на релевантни фактори што ја дефинираат групата.
Чатерџи и неговите колеги очекуваат нивниот калкулатор да биде корисен во одредувањето приоритети за доделување на првите дози на вакцини, но и други превентивни материјали, како што се маските N95. Според упатствата на Американската национална академија на науките, инженерството и медицината, здравствените работници се категоријата со најголем приоритет кога станува збор за вакцинацијата. По здравствените работници, следат постарите лица и оние со веќе постоечки состојби како што е дијабетес.
Луѓето кои имаат дијабетес или се прекумерно дебели се изложени на поголем ризик, но Чатерџи објаснува дека нивниот калкулатор зема предвид неколку фактори при пресметување на ризикот за секоја индивидуа.