На денешната жрепка во Минхен македонската кошаркарска репрезентација ги доби противниците во квалификациите за пласман на ЕвроБаскетот 2025.
Кошаркарите за да дојдат до оваа главна фаза од квалификациите почнаа од втората рунда во претквалификациите каде завршија први во група со Словачка, Норвешка и Данска губејќи само еден натпревар (од Словаците на гости).
Фортуната одлучи да играме во последната Х група против силната Литванија, потоа репрезентацијата на Полска од која деновиве изгубивме во двата подготвителни натпревари, како и незгодната Естонија. Бидејќи во нашата група нема од земјите домаќини, сѐ што треба да направиме за да играме на ЕвроБаскетот е да не завршиме на последното место.
Група Х
- Литванија
- Полска
- Естонија
- Македонија
Квалификациските натпревари ќе се играат во три прозорци и тоа 19-24 февруари 2024, 18-26 ноември 2024 и 17-25 февруари 2025. Секоја репрезентација ќе игра по два натпревара во еден прозорец.
Пласман на завршницата ќе изборат трите највисокопласирани репрезентации од секоја група, освен групите во кои влегуваат кодомаќините на ЕвроБаскетот - Кипар, Финска, Полска и Латвија. Во групите кои ги содржат нациите домаќини, домаќинот и двете други највисоко пласирани селекции ќе се квалификуваат на ЕвроБаскетот 2025.
Македонските кошаркари ќе се обидат по 10-годишна пауза да се вратат на континенталното првенство, откако последен пат настапија на ЕвроБаскетот 2015.
ЕвроБаскетот 2025, 42. издание на континенталното натпреварување на ФИБА, ќе се одржи од 27 август до 14 септември во Тампере (Финска), Рига (Латвија), Катовице (Полска) и Лимасол (Кипар). 24-те квалификанти на завршницата ќе бидат поделени во четири групи, секоја со по 6 репрезентации.
