Македонската кошаркарска репрезентација в петок од 19 часот на домашен терен ги отвора квалификациите за ЕвроБаскетот 2025 против Естонија.
Победнички се враќа Адем Мекиќ во Скопје за да се стави во служба на нашиот репрезентативен колектив. Изминатиот викенд со својот Задар стигна до првиот трофеј во оваа сезона – Купот на Хрватска, па по краток одмор веќе е на тренинг со „Црвено-жолтите“.
Нашето крило ги знае квалитетите на првиот противник во квалификациите за ЕвроБаскетот 2025. И верува дека Македонија пред своите навивачи во петок навечер од 19 часот, во СРЦ „Кале“ предводена од поискусните играчи ќе дојде до триумф против тимот од Балтикот.
„Естонија е репрезентација што добро ја познаваме и на која ѝ ја препуштаме фаворитската улога. Главна одлика им е агресивноста во играта, инсистираат на брза кошарка и мислам дека во последните години играат феноменална кошарка“, вели Мекиќ, пренесува КФСМ.
„Сепак, ние сме домаќини, играме пред нашите навивачи. Имаме релативно млада селекција надополнета со искусни и квалитетни кошаркари. Наше е да излеземе на терен и да го дадеме максимумот, верувам во позитивен резултат. Имаме врвни играчи како Димитријевиќ, Војдан и Дамјан Стојановски, потоа Бојан Крстевски, кои имаат енормно големо искуство и квалитет, надополнети со нашата релативна младост и знаење, така што се надевам на добра игра и позитивен резултат за нас“, додава Мекиќ.
Картите по цена од 250 денари се во продажба преку мрежата на MKTickets, како и онлајн на https://mktickets.mk/event/mkd-est/.
Директен пренос ќе има на SportKlub HD.
