Пресметката број 75 на Сампдорија и Џеноа резултираше со 27. реми откако двата тима постигнаа по еден гол во противничката мрежа. 90 минути одигра нашиот Горан Пандев.
Дербито почна надежно за Пандев кој уште во 4. минута имаше обид за гол, но неговиот удар надвор од шестнаесетникот заврши непрецизно крај голот.
Во 23. минута Пандев беше фаулиран пред домашниот шестнаесетник, но судијата Федерико Ла Пена не се одгласи, а Сампдорија поита во контра. Чехот Јакуб Јанкто премногу лесно го исфрли од игра Доменико Кришито и со добар удар ја доведе Сампдорија во водство. Гостите се бунеа кај судија поради недосудениот фаул врз Пандев кој резултираше со гол во нивната мрежа, но ВАР не реагираше, па резултатот остана непроменет.
Џеноа израмни во 28. минута кога нафрлувањето на Пандев резултираше со гол на Џанлука Скамака, негов прв сезонава во Серија А.
Во вториот дел продолжи брзото темпо, а двата тима имаа по неколку шанси од кои најсериозна беше на нововлезениот Кеита Балде кој во 71. минута ја затресе стативата од голот на Матија Перин.
Нашиот Горан ги одигра комплетните 90 минути во дербито, но за жал не упсеа да се запише во листата на стрелците. Како што пишувавме вчера, Дерби дела Лантерна е единственото градско дерби на кое Пандев играл, а не постигнал гол. Нова шанса ќе има на пролет.
Со ова реми Џеноа има 5 бодови и е н 15. место, додека Сампдорија со 10 е осма. Пандев и соиграчите веќе в среда имаат нов натпревар, оној одложениот со Торино од 3. коло кога поради голем број на позитивни во својот табор не беа во можност да играат.
