Поранешниот директор на Милан, Паоло Малдини, сакал да го доведе Лионел Меси во редовите на „Росонерите“, дури и му се јавил, но Аргентинецот тогаш решил да замине во ПСЖ.
Оваа долго чувана тајна ја откри легендарниот играч и функционер на италијанскиот клуб како гостин во многу популарниот подкаст „Poretcast“.
„Десет дена се обидувавме да го доведеме во Милан, работевме напорно на тоа, а потоа сфативме дека тоа е невозможно. Тој е фантастичен играч, се обидовме, но беше невозможно. Неговото доаѓање во клубот ќе беше нешто спектакуларно, но сега е предоцна да се реализира таа идеја“, изјави Малдини.
За високото мислење на Италијанецот за Меси говори и тоа што не му било сеедно кога прочитал дека Аргентинецот можеби ќе му се приклучел на градскиот ривал Интер.
„Не дека не ми беше сеедно, туку се преплашив кога видов во медиумите дека оваа опција постои“, откри Малдини.
Ситуацијата за која зборува Малдини се случи во 2021 година кога Меси ја напушти Барселона и беше слободен играч на пазарот, а потоа кариерата ја продолжи во Франција, од каде се пресели во САД, каде моментално настапува за Интер Мајами.
