Не е донесена одлука за враќање на Twitter профилот на Доналд Трамп, објави Илон Маск.
Сепак, Маск најави дека на Twitter ќе бидат обновени профилите на други контроверзни личности.
„Новата политика на Twitter е слобода на говорот, но не и слобода на дофат“, напиша Маск на Twitter, додавајќи дека на негативните објави кои содржат говор на омраза ќе им се намали видливоста и компанијата нема да заработува од нив.
Откри и на кои личности им е вратен профилот на Twitter.
„Кејти Грифин, Џордан Петерсон и сатиричниот сајт Babylon Bee се вратени назад. Одлука за враќање на Трамп сè уште не е донесена“, додаде Маск.
Профилот на Грифин беше забранет поради имитирање, таа го смени името на профилот во „Илон Маск“.
Десничарскиот автор и психолог д-р Петерсон беше суспендиран по објава за трансродниот актер Елиот Пејџ.
Профилот на христијанската сатирична страница беше суспендиран од истата причина, откако во март објави дека „Маж на годината за Babylon Bee е Рејчел Левин“, мислејќи на заменик-министерката за здравство на САД, која се декларира за трансродово лице.
Профилот на Трамп трајно е суспендиран по немирите на Капитол Хил во јануари, 2021 година.