Во октомври 2021 година Microsoft го претстави Windows Subsystem for Android (WSA), функција со збунувачко име што му дозволуваше на Windows 11 да покренува апликации наменети за Android на Google. Сепак, на тоа ќе му дојде крајот следната година.
Microsoft објави на страницата Microsoft Learn дека WSA ја губи поддршката на 5 март 2025 година. Дотогаш корисниците ќе можат да инсталираат и користат апликации (од Amazon App Store), па дури и ќе добиваат поддршка доколку наидат на проблеми.
Што ќе се случи по 5 март 2025 година, не е познато. Зборуваме за Windows, па сосема е можно заедницата да ја „оживее“ функцијата, бидејќи некои програмери веќе најдоа начин да ја инсталираат и користат Google Play Store иако тој не е официјално поддржан.
Play Store е најголемиот „ров“ што го има Google околу Android, оперативниот систем е отворен, но не им значи многу на уредите без пристап до Play Store.
Во секој случај, нема информации за промени на Phone Link, така што корисниците сепак ќе можат да користат Android апликации од Windows уредите, но разликата е во тоа што тие ќе ги покренуваат на мобилен и ќе го стримуваат неговиот екран на компјутер. Сепак, само одредени мобилни телефони од одредени брендови ја поддржуваат оваа функција.
Google исто така има свој начин на користење на софтверот Android на компјутер, а тоа е Google Play Games. Како што сугерира името, целта е гејминг, но не постои фундаментална разлика помеѓу апликациите и игриците. Исто така, постојат апликации од трети страни кои работат на софтвер за Android на Windows и Linux.
