Денеска се играат дел од натпреварите од претпоследното коло во Серија А во кое би можеле да го добиеме новиот шампион на Италија.
Во борбата за титулата останаа само Милан и Интер, па Скудетото ќе остане во градот Милано, а поблиску до кревање на трофејот се „Росонерите“ кои имаат два бода повеќе од градскиот ривал.
По 36 одиграни кола Милан има 80, а актуелниот шампион Интер 78 бодови. „Росонерите“ имаат подобар меѓусебен скор (1:1, 2:1), што значи дека на Милан за титулата му се доволни четири бода од преостанатите две средби против Аталанта дома и Сасуоло на гости.
Вечерва на „Џизепе Меаца“ гостува Аталанта, а „Нераѕурите“ се надеваат дека истобојниот тим од Бергамо, кој се бори за излез во Европа, може да им ги расипе сметките на „Росонерите“.
Секако, за да се надева на титулата, Интер треба да го одработи својот дел вечерва на гостувањето кај Каљари и во последното коло на домашен терен против Сампдорија.
Доколку Интер вечер се сопне и загуби од Каљари, Милан може да стане шампион и со бод против Аталанта. Исто така, со победа фудбалерите на Милан стануваат нови шампиони во Серија А ако Интер загуби или одигра нерешено на Сардинија.
Милан од 18 часот ќе игра против Аталанта, а од 20:45 Интер против Каљари на „Унипол Домус“.