Според неофицијални информации, серијата S24 ќе има функции слични на ChatGPT и Google Bard, па ќе може да креира содржина и приказни врз основа на само неколку клучни зборови.
На неодамнешното претставување на своите паметни телефони Pixel 8 и Pixel 8 Pro, Google објави неколку нови функции засновани на вештачка интелигенција (ВИ), но – ако им се верува на најновите гласини – Samsung работи на нешто уште „попаметно“.
Според претходно споменатите, сè уште непотврдени информации, претстојните смартфони Galaxy S24, Galaxy S24+ и Galaxy S24 Ultra на корејската компанија ќе бидат „најпаметните паметни телефони кои користат вештачка интелигенција“, значително пред она што новите уреди Pixel 8 можат да го понудат.
Серијата S24, наводно, ќе има карактеристики сосема слични на ChatGPT и Google Bard chatbots, како што се создавање содржина и приказни врз основа на само неколку внесени клучни зборови.
Самиот Samsung создаде некои дополнителни функции за вештачка интелигенција, како што е „текст во слика“ (text-to-image) генеративната ВИ алатка, наменета за нивните паметни телефони од најновата генерација. Ќе се подобри и ВИ алатката говор во текст (speech-to-text).
Уредите од серијата S24 на некои пазари ќе се напојуваат со новиот чипсет Exynos 2400.
Истиот извор тврди дека Samsung ќе вгради вештачка интелигенција во виртуелниот асистент Bixby, па во иднина ќе може да води „многу повеќе човечки и интелигентни разговори“ со корисникот на уредот.
Уредите од серијата Samsung Galaxy S24, неофицијално, би требало да бидат претставени во текот на јануари 2024 година.
