Познатиот бразилски фудбалер Дани Алвес го минува најлошиот период од својот живот бидејќи три месеци е во затвор поради обвинение за силување, а на повидок нема добра вест.
Актуелната сопруга на Алвес, Јоана Санз, собира документи и сака што поскоро да се разведе од него.
Шпанска Marca пренесува дека Санз била исфрлена од куќата на Алвеш, која со години ја делела со славниот фудбалер.
Динора Сантана, поранешната сопруга и мајка на децата на Дани Алвес, наводно била таа што ја известила Санз дека мора да го напушти неговиот дом.
Санз не сакала да потпише изјава за доверливост и непристрасност и поради тоа не смее да продолжи да престојува во куќата која ја сметала за дом. Таа брзо ги спакувала работите и ја напуштила куќата.
Шпанското ТВ-шоу „Y Ahora Sonsoles“ го откри емотивното писмо што Алвес ѝ го напишал на сопругата.
„Драга моја Јоана, осум години поминавме со многу љубов, почит и взаемна грижа. Последните години беа особено убави со тебе покрај мене. Ти и моите деца Дани Фиљо и Викторија сте најдоброто нешто што ми се случи во мојот живот. Заедно растеме откако се запознавме, од првата минута кога го започнавме нашиот заеднички живот“, напишал Алвес во писмото.
Санз во меѓувреме ги отстрани сите заеднички фотографии од Instagram, додека профилот на Алвес е полн со фотографии со неговата сопруга.
Во ова писмо тој уште еднаш се осврна на делото за кое е обвинет, а кое со презир го отфрла.
„Ме обвинуваат за лаги. Во мојот живот се водам од вредностите на љубовта, почитта и посветеноста. Продолжувам да се борам, како и секогаш, со поддршката на оние до мене кои сакаат да ја докажат мојата невиност на цел свет. Ќе се борам со незапирливата љубов на моите деца, моите родители и оние кои се со мене. Наскоро ќе му ја докажам на светот мојата невиност“, вели Алвес во писмото.
Се очекува наскоро да му биде изречена казна, а ако им се верува на добро упатени извори, тешко дека Алвес ќе може да ја докаже својата невиност во овој случај.
Најтрофејниот фудбалер во историјата остави неизбришлива трага, а во својата богата кариера настапуваше за Баија, Севиља, Барселона, Јувентус, ПСЖ, Саум Пауло и мексиканскиот УНАМ.
За репрезентацијата на Бразил одигра 126 натпревари, а на последното Светско првенство во Катар беше дел од првата екипа.