Владата на јапонскиот премиер Јошихиде Суга одлучи да воведе вонредна состојба во Токио поради коронавирусот, беше соопштено на само две недели пред почетокот на Олимписките игри.
Привремената вонредна состојба ќе биде во сила од понеделник до 22 јули, соопшти владата.
Предвидено е Олимпијадата да се одржи од 23 јули до 8 август.
Причината за воведувањето на четвртата вонредна состојба во Токио е уште едно значително зголемување на бројот на заразени.
Вонредната состојба, сепак, не е затворање со строг полициски час како во другите земји.
Иако граѓаните се повикуваат да останат дома, рестораните се отворени, но не смеат да служат алкохол и да нудат караоке, а навечер треба да затворат порано од вообичаеното.
Јапонија не претрпе експлозија на пандемијата со COVID-19, како што беше случај со многу други земји, но има повеќе од 810.000 заразени и 14.900 мртви, според Reuters.
Бавен процес на имунизација
Бавната вакцинација значи дека само една четвртина од популацијата примила барем една доза вакцина против COVID-19.
Одлуката за воведување нова вонредна состојба во Токио доаѓа откако денеска во главниот град беше објавена бројка од 896 новоинфицирани лица, што е скоро како во средината на мај.
Организаторите на спонзорите вчера им предложиле неколку сценарија за Олимпијадата, изјави извор близок до разговорите.
На спонзорите им било кажано дека доколку јавноста не смее да влегува на стадионите, сите настани ќе се одржуваат без навивачи, што значи дека билетите наменети за спонзорите нема да можат да се користат и тоа ќе биде нов удар врз буџетот на Олимписките Игри, што веќе трпи загуби бидејќ нема продажба на влезници за навивачите.