Русија размислува за воведување КОВИД-пасош, односно дигитална патна картичка - мобилна апликација за меѓународни летови во рамките на Евроазиската економска унија (ЕАЕУ), за да го забрза закрепнувањето на воздушниот транспорт по падот на пазарот поради пандемијата.
Руското Министерство за транспорт разговара за таа мерка со авиокомпаниите, изјави за ТАСС извор од една од руските авиокомпании.
Исто така се разгледува прашањето за забрзување на спроведувањето на дигиталната пропусница IATA Travel Pass, акредитирана од Меѓународната асоцијација за воздушен транспорт, која веќе се применува на некои воздушни линии во странство.
„Конкретно, се разговара за лансирање на специјална апликација или забрзување на употребата на пропусницата на ИАТА. Целта е да се забрза обновувањето на меѓународниот воздушен сообраќај што е можно повеќе, да се стимулираат другите земји да го отворат билатералниот сообраќај, делумно или целосно ограничен поради пандемијата на коронавирус“, рече изворот за ТАСС.
