Чудесниот Лионел Меси продолжува да ги решета противничките мрежи во дресот на Интер Мајами. Овој пат беше двоен стрелец во осминафиналето од американско-мексиканскиот Лигс куп против Далас.
Меси го доведе Интер Мајами во водство во 6. минута. Жорди Алба мина по левата страна и одигра повратно додавање за Аргентинецот, кој од 18 метри извонредно погоди за 1:0.
Факундо Кињон во 37. минута и Танзаниецот Бернард Камунго во 45-тата се погрижија за пресврт и Далас на одмор замина со предност од 2:1. Кога Алан Веласко во 63. минута зголеми на 3:1, се чинеше дека Меси ќе го доживее првиот пораз во САД. Бенџамин Кремаски во 65-тата намали на 3:2, а голот за 4:2 всушност беше автогол на Финецот Роберт Тејлор.
Интер со автоголот на Марко Фарфан во 80. минута намали на 4:3, а потоа на сцена стапи Меси во 85. минута. Како и безброј пати до сега, тој го изведе слободниот удар толку прецизно колку што не можеше попрецизно и погоди за 4:4.
Според правилата, веднаш по крајот на натпреварот започна пенал-рулетот. Прв погоди Меси, а го следеа сите негови соиграчи, додека Пекстон Помикал промаши во редовите на Далас, а во четвртфиналето се пласираше Интер Мајами со победа од 5:4 на пенали.
Интер Мајами во четвртфиналето ќе игра против подобриот од дуелот меѓу Шарлот и Хјустон Дајнамо.
Меси на четирите претходни натпревари во дресот на Интер Мајами славеше исто толку пати. Постигна 7 гола, забележа 1 асистенција, а беше прогласен за најдобар играч на сите четири натпревари.