Американецот Џереми Микс кого го нарекуваат „најзгодниот криминалец“ не доби дозвола да влезе во Велика Британија неколку часа пред забавата организирана по повод лансирањето на списанието Man About Town чија насловна страница ја краси тој.
Микс стигнал на аеродромот Хитроу со авион на American Airlines од Лос Анџелес во придружба на сопругата Мелиса и менаџерот Џим Џордан, но не стигна до забавата.
Неговиот менаџер рече дека Микс не бил уапсен, но бил задржан од граничната полиција и вратен во Њујорк иако ги имал сите потребни документи.
„Не го пуштија да влезе во земјата. Вознемирен е, го качиле на авион со полициска придружба“, стои на веб-страницата на поранешниот затвореник и актуелен модел.
Микс се снимал додека бил на аеродром и на снимката вели: „Смачено ми е од ова. Не ме пуштија, Лондон не ме сака тука иако јас ја отслужив својата казна. Ова е глупост. Со придружба, со придружба, нема смисла.“
Микс го привлече вниманието на јавноста кога полицијата од Стоктон објави негова фотографија откако беше уапсен за поседување полуавтоматско оружје.
Беше осуден на 27 месеци затвор и откако излезе од затвордоби договор да работи како модел.
Неговиот менаџер тврди дека Микс имал виза и писмо од полицискиот службеник задолжен за неговата условна казна.
Заедно отишле на царина и на пасошка контрола, но откако Микс го покажал писмото бил тргнат на страна.
Менаџерот и сопругата го чекале во ресторан на аеродромот пет часа, а потоа им кажале дека Џереми ќе биде вратен во САД.
„На прав пат е, ова е неговиот нов живот. Сега е многу тажен и се надеваме дека ова е само една препрека по која ќе се крене на нозе“, рече менаџерот и додаде дека ќе бара помош од Американската амбасада.
