Американската вселенска агенција НАСА ја одложи закажаната вселенската прошетка на астронаутите бидејќи постои загриженост за безбедносна закана од вселенскиот отпад.
НАСА не откри од каде доаѓа вселенскиот отпад, но јасно е дека неговата близина е доволна причина да се одложи вселенската прошетка. Русија намерно разнесе свој сателит во орбитата пред две недели, што резултираше со илјадници разлетани фрагменти опасни за Меѓународната вселенска станица.
Астронаутите на НАСА Кајла Барон и Томас Маршбурн веќе ги облекоа своите вселенски одела во вторникот и беа подготвени да ја напуштат станицата за да заменат антена, но мисијата беше одложена. Тоа ќе беше петта вселенска прошетка за Маршбурн и прва за Барон.
Агенцијата соопшти дека нема доволно време да го процени ризикот што вселенскиот отпад го претставува за астронаутите, па најдобро решение е да се одложи вселенската прошетка.
Ова е втор пат во последните две недели вселенскиот отпад да создаде проблем и да ги наруши плановите на МВС. На 15 ноември, контролорите од Земјата го разбудиле екипажот и ги советувале да најдат засолниште бидејќи Русија извршила противсателитско тестирање. Русија користеше проектил за да го уништи својот сателит, а резултатот се 1.700 парчиња отпад што може да се следат и илјадници помали парчиња чие следење е невозможно. Поради фактот што сателитот орбитирал релативно блиску до МВС, отпадот може периодично да поминува покрај станицата.
Уште не е потврдено дали прошетката е одложена токму поради остатоците од рускиот сателит.