На Фабио Паратичи му е забрането професионално да се занимава со активности поврзани со фудбалот ширум светот.
Доколку неговата жалба не биде прифатена, Паратичи ќе мора да се повлече од функцијата спортски директор на Тотенхем откако Меѓународната фудбалска федерација објави дека суспензијата која му е изречена во Италија важи за целиот свет.
Паратичи беше суспендиран заедно со целото раководство на Јувентус, што исто така беше казнето со одземање на 15 бода.
Во првиот момент, суспензијата која му беше изречена од 30 месеци се однесуваше само на неговата работа во Италија, но одлуката на ФИФА сега е суспензијата да важи за целиот свет.
„ФИФА може да потврди дека на барање на Италијанската фудбалска асоцијација, претседателот на Дисциплинската комисија на ФИФА донесе одлука дека казните изречени од Италијанската фудбалска федерација за неколку фудбалски функционери треба да се прошират на целиот свет“, се вели во соопштението од ФИФА.
Јувентус и сите суспендирани функционери поднесоа жалби на одлуката на ФА на Италија, но доколку истата не биде усвоена, јасно е дека Паратичи повеќе нема да може да ги извршува своите обврски во Тотенхем.
Тоа значи дека, откако го загуби тренерот Антонио Конте, Тотенхем ќе остане и без спортски директор. Паратичи беше вклучен во фалсификување финансиски извештаи во Јувентус за време на пандемијата на коронавирус.
Поради ова, италијанската фудбалска асоцијација му изрече 30-месечна суспензија, што особено не му пречеше бидејќи работеше во Англија. Но, ФИФА одлучи да ја прошири неговата забрана од Италија на сите земји во кои има јурисдикција. Спарс така останаа без човекот кој беше задолжен да им најде нов тренер по заминувањето на Конте.
Но, тие сè уште се во прилично добра позиција во првенството. Тие се на четвртото место во рангирањето со 49 бодови, односно бод помалку од третиот Манчестер Јунајтед. Речиси е сигурно дека на крајот од сезоната ќе имаат место кое ги води во некое европско натпреварување.