Голманот на Баерн и германската репрезентација, Мануел Нојер (37), ќе брани на утрешниот натпревар против Дармштад, потврди тренерот на германскиот шампион, Томас Тухел.
Нојер е надвор од терените од почетокот на декември минатата година кога на скијање ја скрши потколеницата на десната нога.
„Ќе брани утре ако денеска не се случи ништо неочекувано. Тој е возбуден, ние сме возбудени, многу луѓе се возбудени поради тоа. Уверен сум дека брзо ќе биде фит, а сега ќе ѝ веруваме на неговата интуиција и искуство. Потребни му се натпревари. Тој е подготвен за нив веќе неколку недели, а сега ќе ја добие својата шанса“, рече Тухел.
Нојер одигра 489 настапи за Баерн и освои 27 трофеи, вклучувајќи 10 титули во германското првенство и 2 титули во Лигата на шампионите.
Ова за него е 13-та сезона во дресот на баварскиот клуб откако летото 2011 година дојде од редовите на Шалке 04.