Истражувачката репортерска лабораторија (ИРЛ) синоќа објави продолжение на шокантниот документарен филм „Нечиста крв“ што е резултат на 22-месечно истражување за наводните злоупотреби во клиниката „Жан Митрев“.
„Истражувањето „Нечиста крв” е базирано на 24 пријави на граѓани од Македонија и Косово. Нивните потресни сведоштва не доведоа до многу откритија, но обемноста на откритијата не дозволи сите да бидат објавени во документарниот филм. Затоа ја продолжуваме приказната за клиниката Жан Митрев, со сведоштвото на Жанета Сарагинова, чиј сопруг е жртва на лекарска грешка и финансиски малверзации со Фондот за здравство од страна на клиниката Жан Митрев“, велат од ИРЛ.
Оттаму додаваат дека ова е видеото што го гледале министерот за здравство Беким Сали и директорката на Фондот за здравство Магдалена Филиповска Грашоска во новиот поткаст на Редакција кој ќе се емитува денес во 20:15 на МРТ1 и на YouTube каналот на ИРЛ.
