Дерек Шовен и Џорџ Флојд имале расправии додека работеле заедно како обезбедување во ноќен клуб, изјави за CBS нивниот поранешен колега.
Дејвид Пини кој работел со Флојд и Шовен во ноќен клуб, рече дека Шовен бил „премногу агресивен“, при што постојано имале конфликти со него.
„Верувам дека она што се случи на 25 мај е еден вид на одмазда“, рече Пини.
Дерек Шовен го уби Џорџ Флојд на 25 мај во Минеаполис. На снимката којашто беше објавена на социјалните мрежи, снимена од случаен минувач, се гледа како Флојд лежи на земја со лисици на рацете, моли за помош и повторува дека не може да дише. Во таква положба, со приклештен врат, полицаецот со едното колено го држи Флојд повеќе од седум минути, иако тој го моли за помош.
Полицаецот Дерек Шовен се товари за „убиство од трет степен“ и „убиство без умисла“. Останатите тројца полицајци вмешани во инцидентот се отпуштени од работа.
Објавено е видеото на кое се гледа како полицаецот продолжува да го притиска Флојд на вратот со колено, дури и откако тој се изјаснува дека не може да дише и моли да се исправи, што дополнително го разгоре длабоко вкоренетиот гнев на граѓаните кон полициската бруталност и убиства насочени кон Афроамериканците во САД.
Смртта на Флојд предизвика низа протести против расизмот во САД и ширум светот.
