Градоначалникот на Општина Центар, Горан Герасимовски, ги информираше жителите на општината кои имаат незаконски поставено паркинг блокатори дека во наредниот период истите треба да ги отстранат, во спротивно ќе бидат санкционирани.
Нов обид за борба со безредието на јавните паркинг површини. Општина Центар почнува акција за отстранување на сите незаконски поставени блокатори, со кои одредени жители јавните паркиралишта си ги претвориле во сопствени паркинг места.
„Во наредниот период започнуваме засилени инспекциски надзори за незаконски поставените паркинг блокатори на самите улици, тротоари и останати јавни површини“, извести градоначлалникот Герасимовски.
„Ова е една од мерките со кои во периодот што следи ќе посветиме повеќе внимание на процесот на ослободување на јавните простори. Упатувам апел до сите граѓани и правни лица кои имаат незаконски поставено блокатори на јавни површини, во најкраток можен рок самите да ги отстранат. Во спротивно, блокаторите ќе бидат отстранети од страна на Општината, а одговорните ќе бидат санкционирани согласно Законот за јавна чистота“.