Њујорк, 1 август 2019 (МИА) – Светскиот рекет број 2, Наоми Осака призна дека последните неколку недели биле најлошите во нејзиниот живот и дека не ужива во играта по освојувањето на Австралија опен во јануари.
Титулата на Јапонката во Мелбурн беше втора последователна од Гренд-слем турнирите по нејзиниот успех на УС Опен, кој ја истрела 21-годишната тенисерка на местото број 1 на ВТА листата. Од тогаш, сепак, таа не успеа да освои турнир, ја загуби првата позиција во рангот и изгуби сензационално во првото коло на Вимблдон од Jулија Путинцева.
Осака на социјалните мрежи објави порака до своите обожаватели, објаснувајќи го колапсот во нејзината форма.
„Кога работите тргнуваат наопаку, јас се обвинувам себеси 100%. Имам тенденција да се исклучувам, бидејќи не сакам да занимавам никого со моите мисли или проблеми“, пишува Осака.
„Неочекувано, во најлошите месеци од животот, доживеав некои од моите најдобри моменти, затоа што запознав многу нови луѓе. Велејќи го ова, искрено можам да кажам дека не уживам во играта по Австралија опен – нешто за што во моментов сум свесна. Научив многу за себе и мислам дека пораснав толку многу како личност минатата година, така што навистина сум возбудена за тоа што носи иднината. Ќе се видиме на подготвителните турнири пред УС Опен“, додава таа.
Осака ќе се обиде да се врати во најдобра форма со турнирот во Торонто следната недела.
