Тричковски и Махмудов стрелаа по двапати, деби со гол на Муслиу, Ристовски, Јаховиќ и Ѓорѓев по еднаш ја тресеа противничката мрежа, додека Тодоровски асистираше.
Албанија
Благоја Тодоровски забележа асистенција во победата на неговата Теута над Луфтетари со 3:1. Тој во 30-тата минута му асистираше на Црногорецот Никач кој погоди за 1:0. Тодоровски одигра цел натпревар.
(на 0:27)
Ерменија
Денис Махмудов постигна два гола во победата од 4:1 на неговиот Пјуник над Јереван. Прво во 9-тата минута го отвори резултатот со убав гол од слободен удар, а потоа на три минути пред паузата зголеми на 3:0.
(првиот гол е на 0:46, вториот на 4:03)
Кипар
Иван Тричковски беше творец на победата на АЕК на гости кај Пафос постигнувајќи ги двата гола. Прво во 61-вата минута Тричко изнуди пенал откако еден домашен дефанзивец со рака го блокираше неговиот удар, а нашиот интернационалец успешно го реализираше ударот од белата точка. И вториот гол го постигна од пенал, овој пат во третата минута од судиското надополнување. Тричко го одигра целиот натпревар, а неговиот соиграч Даниел Мојсов не беше во тимот.
(првиот гол е на 3:15, вториот на 6:22)
Словачка
Милан Ристовски ѝ донесе бод нa Нитра на гостувањето кај Тренчин. Неговиот тим губеше со 2:1 кога Ристовски погоди во 57-мата минута. Одигра 84 минути бидејќи пред крајот беше заменет.
Турција
Адис Јаховиќ одигра цел натпревар во поразот на неговата Малатијаспор пред своите гледачи од Аланијаспор. Тимот на Адис губеше 0:3 на полувреме, а во вториот дел постигна два гола неуспевајќи да даде и трет за реми. Токму Јаховиќ во 57-мата минута беше творец на голот за 2:3.
Унгарија
Висар Муслиу го одигра својот деби натпревар за Фехервар, а дури и постигна гол. Во 41-вата минута Муслиу во негов препознатлив стил со глава ја затресе гостиската мрежа отворајќи го резултатот. Го одигра целиот меч, неговиот тим славеше со 3:0, а 90 минути одигра и неговиот соиграч Бобан Николов.
(на 4:05)
Швајцарија
Никола Ѓорѓев во 55-тата минута му донесе водство од 2:1 на Грасхоперс на тешкото гостување кај Вадуц. Во судиското надополнување беше повлечен од игра по што неговиот тим прими гол за реми.