Контроверзниот белоруски претседател доби свој фаншоп во главниот град каде неговите фанови можат да се подноват со облека со неговиот лик или негови познати цитати.
Наречен „последниот европски диктатор“, Александар Лукашенко (а всушност оригинално Алјаксандр Лукашенка) има многу противници во својата земја, иако редовно победува на изборите. Но, има и такви кои го обожаваат и кои сега добија прилика неговиот лик да го носат и на маици и дуксери.
На Telegram излезе видео од нестрпливите Лукашенко фанови кои чекаат во редици пред новотворениот фаншоп за да си купат сувенир со ликот и делото на злогласниот диктатор.
Фаншопот е именуван „Первый“ (Прв) алудирајќи на тоа дека Лукашенко е првиот претседател на Белорусија по независноста од СССР, и досега единствен откако дојде на власт во 1994 година.
Освен неговиот лик, може да се купи и облека на која е испишана некоја од многуте мудрости кои Лукашенко ги има кажано, како на пример „Претседател не се станува - претседател се раѓа“.
На отворањето робата веднаш се распродаде, а од Telegram профилот на „вечниот“ стигна известување до разочараните купци кои не стигнале на време:
„Доколку не успеавте да купите на отворањето, не очајувајте. Ќе има доволно роба за секој. А, доколку снема, ќе направиме веднаш“.