Тренерот на Манчестер Сити, Пеп Гуардиола, рече дека играчот на неговиот тим, Ерлинг Холанд, заслужува да ја освои наградата Златна топка за најдобар фудбалер во 2023 година.
Холанд годинава постигна 52 гола на 53 натпревари и му помогна на Сити да ја освои тројната круна. Норвешкиот голгетер е меѓу 30-те кандидати за престижната награда која ќе биде врачена на 30 октомври.
„Холанд би требало да ја освои – да. Освоивме тројна круна, а тој постигна 50 голови“, изјави Гуардиола.
За најголем фаворит за освојување на Златната топка се смета фудбалерот на Интер Мајами, Лионел Меси, кој со Аргентина ја освои светската титула на Мундијалот во Катар.
Пеп, кој во минатото му беше тренер на Меси во Барселона, наведе дека Аргентинецот заслужува индивидуална категорија, кога е во прашање Златната топка.
„Златната топка мора да биде од два дела. Една за Меси, а другата за останатите. Најлошата сезона за Меси, е најдобра за другите“, наведе Каталонецот.
