Скопје, 8 април 2020 (МИА) – Министерството за здравство попладнево соопшти дека почина родилката позитивна на COVID-19 од Куманово, која на 30 март на Клиниката на гинекологија и акушерство роди недоносено машко бебе.
Бебето е во добра состоја, но е сѐ уште на интензивна нега на Клиниката за гинекологија.
-Министерството за здравство со големо жалење ја информира јавноста дека предмалку почина родилката позитивна на COVID-19 од Куманово на 27 години. Таа на 30 март на Клиниката за гинекологија и акушерство во Скопје роди недоносено машко новорoденче, негативно на вирусот. Родилката беше префрлена на Инфективната клиника на 31 март поради влошена клиничката слика и отежнато дишење. И покрај напорите на лекарите, брзиот и агресивен развој на болеста беше фатален, се наведува во соопштението од Министерството за здравство.
Клиниката за гинeкологија и акушерство информира дека бебето е во добра состојба, сѐ уште е на интензивна нега и под постојан надзор на тимот од клиниката.
