Пол Погба, играчот за врска на Манчестер Јунајтед, се огласи во врска со сѐ погласните шпекулации дека можно е да го напушти „Олд Трафорд“ во јануари.
Погба (27) се огласи на социјалните мрежи по градското дерби со Манчестер Сити (0:0).
Неговиот агент Мино Рајола неодамна изјави дека Французинот е несреќен во Јунајтед и дека „неговото време таму истече“.
Тоа крена голема прашина, навивачите сметаат дека разделбата е најдобра опција, а Оле Гунар Солскјер не сака да зборува за Рајола и инсистира на тоа дека Погба е играч на Јунајтед.
Французинот не ги коментираше изјавите на неговиот агент, но додаде дека тој бил „1.000 проценти вклучен“ во случувањата во клубот.
„Отсекогаш сум се борел и секогаш ќе се борам за Јунајтед, моите соиграчи и навивачи. Шпекулациите се небитни... Иднината е нешто далеку, она што е важно е сегашноста, а јас сум вклучен 1.000 проценти! Секогаш сме посилни заедно. Сè е јасно меѓу мене и клубот и тоа нема да се промени. Кога не знаете што се случува внатре, не зборувајте", објави тој со хаштагот „кажи ја вистината или молчи“.
Погба беше во стартната постава на само шест натпревари од почетокот на сезоната, а имаше и проблеми со коронавирусот, поради што му требаше некое време да биде физички подготвен.
