Поранешниот НБА кошаркар, а подоцна и филмски актер Рашид Бирд, беше осуден на 90 години затвор за серија сексуални напади во 2015 година.
Бирд, кој беше член на НБА тимовите Лос Анџелес Лејкерс и Сакраменто Кингс, но не одигра ниту една минута во НБА, туку играше само како член на филијали во развојната Д-Лиг (денешна НБА Џи-Лиг), беше уапсен во 2020 година од полицискиот оддел во Лос Анџелес (ЛАПД) откако една од жртвите го обвини за сексуален напад во 2019 година.
Истрагата на ЛАПД откри дека има многу повеќе жртви отколку што се мислеше, бидејќи Бирд, кој исто така имаше актерска кариера, наводно го користел својот шарм и актерска вештина за да манипулира со бројни жртви.
„Тој најпрво ги шармирал своите жртви нагласувајќи го својот статус на познат спортист и наводна славна личност. Но, тоа брзо ескалирало во насилство и силување“, изјави детективката од ЛАПД, Дара Браун, која го истражуваше случајот.
Полицијата, исто така, јавно им се заблагодари на сите храбри жени кои излегоа со информации и помогнаа да се стави сексуалниот предатор зад решетки.
„ЛАПД им се заблагодарува на храбрите жени кои ни ги кажаа своите приказни. Иако истрагата траеше неколку години, ние сме благодарни што Бирд повеќе не шета слободно по улиците“, заклучи детективот.
Во 2003 година Бирд не беше избран на драфтот, а подоцна се обиде да влезе во НБА преку развојната лига. Прво се појави во многу реклами, а во 2008 година доби улога во филмот „Semi-Pro“ на Вил Ферел и во 2009 година во краткиот филм „Bring Your 'A' Game“.