Возачот на Мерцедес, Џорџ Расел, верува дека тимот на Ред Бул ќе победи на секоја трка оваа сезона, врз основа на брзината и сигурноста што ја покажаа во условите на трката откако ден претходно го обезбедија првиот ред во квалификациите.
Ред Бул доминираше во првиот викенд од сезоната во Бахреин и со тоа го оправда статусот на фаворит во пресрет на новата сезона, а Леклер им беше најблизок конкурент сѐ додека не се откажа во 40-тиот круг.
Мерцедес имаше лош викенд во кој завршија како четвртопласирана екипа по неверојатниот подвиг на Астон Мартин кој си обезбеди подиум со третото место на Алонсо.
Како седми, Расел беше најлошо пласиран меѓу возачите на четирите најдобри тимови, без Леклер, а во последниот дел од трката беше претекнат од Строл, кој се мачеше со болидот по пропуштените тестови.
„Ред Бул го осигура ова првенство, не верувам дека некој ќе може да се бори со нив годинава“, рече Расел.
„Очекувам да победат на секоја трка сезонава. Тоа е мојот облог“.
„Со вакви настапи, не гледам некој што може да ги предизвика“.
Најблиску до перфектна победа во една сезоната беше тимот на Мекларен Хонда во 1988 година со Аиртон Сена и Ален Прост, кои победија на 15 од 16 трки (93,75%), а втор беше Мерцедес во 2016 година (19/21 = 90,48%) со Луис Хамилтон и Нико Розберг.
И додека Ред Бул имаа не толку голема предност од 0,292 секунди пред Леклер во Ферари, кој не го возеше последниот Q3 круг, во трката предноста беше многу поголема, па Верстапен беше и за секунда побрз во некои делници.
Покрај тоа, Расел вели дека брзината на Ред Бул овој викенд беше релативно полоша отколку при тестирањата.
„Нивната брзина овој викенд беше побавна отколку при тестирањата, што е малку чудно“, рече тој.
„Но, знаете, во моментов им е лесно и можат да прават што сакаат“.
„Можеби нема постојано да бидат на пол позициите, бидејќи знаеме дека Ферари е многу брз во квалификациите. Но, кога станува збор за брзината на трката, мислам дека тие се во многу, многу силна позиција“.
