Се чини дека Реал Мадрид ја склучи најголемата зделка во својата клупска историја.
„Работата е завршена“, пренесуваат шпанските весници Marca и AS тврдејќи дека Реал и Борусија од Дортмунд го договориле не само износот на отштета, туку и динамиката на исплатата.
Џуд Белингам заминува од Дортмунд и се сели на „Сантјаго Бернабеу“. Во неколку рати мадридскиот клуб ќе ја обештети Борусија со 120 милиони евра, 5 милиони повеќе отклолку што некогаш го исплати Челси за Еден Азар (115 милиони евра летото 2019).
„Реал и Џуд Белингам речиси договорија сѐ, остана уште само да се закаже состанок помеѓу Реал и Борусија за да се договорат деталите. Преговорите се во завршна фаза“, пренесува секогаш одлично информираниот Фабрицио Романо.
AS воедно додава дека договорот со Белингам нема да влијае на плановите на Реал кои вклучуваат понуда за нови договори за Лука Модриќ и Тони Крос, додавајќи дека доаѓањето на 19-годишниот играч од средината значи и помала минутажа за хрватскиот ветеран наредната сезона.
Белингам во Борусија дојде летото 2020 од редовите на Бирмингам Сити за 25 милиони евра. Токму во тој клуб ја почна кариерата каде со 16 години и 38 дена стана најмладиот играч на овој клуб, а потоа со 16 години и 63 дена и најмладиот што постигнал гол. Актуелен е репрезентативец на Англија за која досега има 24 настапи и 1 гол, меѓу кои и настап на ЕУРО 2020 и Мундијалот 2022.
