Високи руски воени лидери неодамна разговарале кога и како Москва би можела да употреби тактичко нуклеарно оружје во Украина, според американски официјални претставници.
Рускиот претседател Владимир Путин, наводно, не учествувал во споменатиот разговор, но фактот дека воениот врв разговарал за тоа, ја загрижил администрацијата на Џо Бајден. Тоа покажува дека руските генерали се фрустрирани од неуспесите на бојното поле и дека заканите на Путин за употреба на нуклеарно оружје не се само празни зборови.
Американските власти, сепак, наведуваат дека досега не виделе докази дека Русија преместува нуклеарно оружје или презема други тактички подготовки за таков напад, пишува New York Times
Информациите за разговорот на руската команда пристигнаа во исто време кога Москва ја обвини Украина дека планира да ја користи таканаречената „валкана бомба“ - експлозив со радиоактивен материјал. Ова беше проследено со серија контакти меѓу американските и другите западни функционери и нивните руски колеги, вклучително и два разговори меѓу американскиот секретар за одбрана Лојд Џеј Остин и рускиот Сергеј Шојгу.
Иако ризикот од понатамошна ескалација останува загрижувачки, претставници на администрацијата на Бајден велат дека телефонските разговори меѓу западните и руските колеги кон крајот на минатиот месец донекаде ги намалиле стравувањата од нуклеарни тензии.
Кон ова придонесе говорот на Путин минатиот четврток во кој тој негираше дека Москва се подготвува да употреби нуклеарно оружје во Украина.
„Не гледаме потреба за тоа. Тоа нема смисла, ниту политички, ниту воено“, рече тогаш Путин.
