Австрискиот град Салцбург, среде туристичката сезона, ги исклучува светлата на главните атракции еден час порано за да заштеди електрична енергија во време кога земјата, како и цела Европа, се соочува со енергетска криза која се наѕира.
Почнувајќи од понеделник, рефлекторите што ги осветлуваат главните знаменитости, вклучително и тврдината Хоензалцбург, ќе бидат исклучени еден час порано, на полноќ, најави градскиот советник Мартина Бертолд.
Затемнувањето на светлата во Хоензалцбург, една од најголемите средновековни тврдини во Европа што се издигнуваат над центарот на градот, ќе биде особено ефикасно бидејќи бара околу 13.000 вати, рече Бертолд.
Со мерката ќе бидат погодени и црквите и спомениците во градот во северозападна Австрија.
Оваа мерка доаѓа во исто време кога реномираниот музички и драмски фестивал во градот Салцбург е во полн ек, настан на кој обично присуствуваат стотици илјади посетители.
Во блискиот Линц, градските власти деновиве најавија дека во 23 часот ќе бидат исклучени светилките на мостовите и другите јавни објекти.
Градот Фелдкирх, во западната австриска провинција Форарлберг, најави дека планира да престане да го осветлува својот историски центар на градот ноќе, не само за да ги намали трошоците за електрична енергија, туку и да ги мотивира граѓаните да штедат енергија, изјави градоначалникот Волфганг Мат.
