Фернанду Сантуш открива дека Кристијано Роналдо има една зацртана цел кон која се стреми да ја оствари, иако тоа е неверојатно тешко.
Освои сѐ на клупски план: првенства, купови, суперкупови, Лига на шампиони, Светско клупско првенство. Но, за да биде најдобар помеѓу најдобрите му фали едно нешто, нешто кое се освојува само со репрезентацијата.
„Тој повеќе не мисли на индивидуални достигнувања туку на поголема цел, а тоа е да го освои Светското првенство со неговата земја“, тврди селекторот Фернанду Сантуш во изјава за дневниот лисабонски спортски весник A Bola.
Роналдо сруши куп рекорди со своите голови. Викендов му даде хет-трик на Каљари, па и Пеле конечно му го предаде приматот за најдобар голгетер во историјата.
„Сигурен сум дека Кристијано е екстра мотивиран. не само поради тоа што постигнува голови. Тој има додатна мотивација кога игра со националниот тим. Сигурен сум дека на собирот ќе дојде со истата амбиција, не мислејќи на лични цели туку фокусирајќи се на оние на репрезентацијата“, додава тој.
Роналдо во 2016 стана европски шампион со својата земја, а потоа ја освои и Лигата на нации. Но, Мундијалот на ФИФА е врвот за секој фудбалер.
„Знам дека неговиот огромен сон е да биде дел од остварувањето на една цел, а таа е да го освои Светското првенство. Тоа е главната цел“, завршува селекторот.
Роналдо досега има настапено на 4 Мундијали почнувајќи од 2006, па 2010, 2014 и последно 2018. Најблиску беше на неговиот прв Мундијал кога Португалија во полуфиналето загуби од Франција и на крајот заврши четврта.
Наредниот е во 2022 година кога Роналдо ќе има полни 37 години, но со оглед на одличната физичка подготвеност не е за сомневање дека ќе биде во најдобро издание на планетарниот собир во Катар.
Португалија квалификациите ги почнува на 24 март против Азербејџан, натпревар кој ќе се одигра на неутрален терен во Торино. Потоа гостува кај Србија на 27 и кај Луксембург на 30-ти.